Կամբոջայի Թագավորությունում ՀՀ դեսպան Վահրամ Կաժոյանի հավատարմագրերի հանձնման պաշտոնական արարողություն Կամբոջայի Թագավոր Նորոդոմ Սիհամոնիին‬‬‬‬‬‬‬‬‬‬‬:

18 օգոստոսի, 2022

2022 թ. օգոստոսի 18-ին Կամբոջայի Թագավորությունում ՀՀ դեսպան Վահրամ Կաժոյանը (նստավայրը՝ ք. Հանոյ) իր հավատարմագրերը հանձնեց Կամբոջայի Թագավոր Պրեա Բաթ Սամդեք Պրեա Բորոմնիթ Նորոդոմ Սիհամոնիին:

Հավատարմագրերի հանձնման հանդիսավոր արարողությունից հետո կայացած զրույցի ժամանակ Կամբոջայի Թագավոր Նորոդոմ Սիհամոնին, շնորհավորեց Վահրամ Կաժոյանին՝ Կամբոջայի Թագավորությունում ՀՀ առաջին դեսպան նշանակվելու կապակցությամբ, մաղթեց նրան արգասաբեր գործունեություն՝ ի շահ երկու երկրների ու ժողովուրդների և վստահություն հայտնեց, որ ՀՀ դեսպանը կիրականացնի իր վրա դրված բարձր առաքելությունը:

Նորին Մեծությունը բարձր գնահատեց հայկական դարավոր պատմությունն ու մշակույթը, մասնավորապես նշելով հայերի՝ մարդկությանը տված այնպիսի պատմա-ճարտարապետական կոթողներ, ինչպիսիք են Մաստարայի, Ախթամարի եկեղեցիներն ու Նորավանքը: Նա նաև նշեց, որ ամբողջ աշխարհն է հիանում Արամ Խաչատրյանի երաժշտությամբ ու Սերգեյ Փարաջանովի ֆիլմերով:

Դեսպան Կաժոյանը շնորհակալություն հայտնելով Նորին Մեծությանը հանդիսավոր արարողության և ընդունելության համար՝ իր հերթին բարձր գնահատեց Կամբոջայի և համայն մարդկության այնպիսի մեծագույն համաշխարհային ժառանգության գլուխգործոցներ, ինչպիսիք են Անգկոր Վաթ, Թա Պրոմ և Բայոն վանական համալիրները: Դեսպանը նաև կարևորեց 2021 թվականին Հայաստանում Կամբոջայի Թագավորության առաջին դեսպանի նշանակումը և պատրաստակամություն հայտնեց նրա հետ համատեղ աշխատելու:

Կողմերը քննարկեցին երկու երկրների միջև հետաքրքրություն ներկայացնող ոլորտներում հետագա հարաբերությունների զարգացման, միջազգային կազմակերպություններում համագործակցության հետագա խորացման հնարավորություններն, ինչպես նաև երկու երկրների միջև իրավապայմանագրային դաշտի ընդլայնմանը, ցեղասպանությունների կանխարգելմանը, մշակութային-զբոսազբոսաշրջային փոխանակումներին վերաբերող հարցեր:

Նախորդ օրը՝ օգոստոսի 17-ին Կամբոջայի Թագավորությունում ՀՀ դեսպան Վահրամ Կաժոյանն իր հավատարմագրերի պատճենները հանձնել էր Կամբոջայի Թագավորության Արտաքին գործերի և միջազգային համագործակցության նախարարության արարողակարգի վարչության պետ Հուլկրանգ Ֆանանգին (Mr Hulkrang PHANANG):

Հանդիպումների ժամանակ դեսպանին ուղեկցում էր ՀՀ դեսպանության երկրորդ քարտուղար Արամազդ Մուրադյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր